Home | Contact Us | Sitemap

Kotha

Bhogsonnem
(18 May '09)

Bhogsonnem

Wellington desacho Raza ek favtt aplea eka dexdrohi xipayak mornnachi kheast formayta.  To zodd kallzan mhonnta  "Itlea xur vir xipayak mornnachi kheast formaunk mhaka khub dukh bhogta, punn kitem korum, hanvem soglle kaide vaprun pollele ani tanche promannem taka faxi favo.  Kitlosoch temp hanvem to sudortolo mhonn vatt polleli, punn to sudrunk na, dekhun mhaka taka faxiechem formann formauchem poddlem."  Punn tea Razan tea xipayachea sangateank tache vixim ulounk mekllik dili.  Tednam tachea eka sangatean mhollem "Raza tunvem taka sudarche soglle proyotn korun pollele, punn tumi tache chukik taka bhogsonnem diun polleunk na."  Ani Razan khoreanich taka bhogxilo.  Tea disa savn to xipay bodol'lo ani Razacho pramannik soinik zalo.

 
Svotakhatir vichar kor
(01 May '09)

Svotakhatir vichar kor

France desantlea eka soimbmogean ek favtt kiddincher ek proyog kelo.  Tannem kaim kiddi ghetleo ani tankam ek rosroxit zhadd aslolea vazachea kanttar soddleo.  Poile kiddichem nak nimnne kiddiche xempddek tenkta oxi ek volluch tannem toyar keli.

Tanche sonvoye promannem teo kiddi eka mekachi xempddi dhorun tea vazachea kanttar sat dis ani sat rati bhonvleo ani xevttak bhuken ani puro zavn teo meleo.  Jevonn itlem lagim asun legit teo vollvollun meleo, karonn tankam chintpachi xokt na.  Tech porim monis legit jednam vichar korinastana lokamni apnnayl'li sodanchi sonvkollichi vattuch vaporta tednam to jivitant fuddem vochunk pavona ani kednam kednam to trasant poddta.

 
Nosay
(15 April '09)

Nosay

Greece desant ek mhan khellgoddi aslo.  To khub lokamogall aslo, dekhun lokamni tache yadik tacho ek putllo ubarlo.  Lok taka khub bhouman ditale, punn tacho ek dusman aslo. Tachean tem polleum nozo aslem, to khub zolltalo.  Koxe-i toren ti murti moddun uddoytoloch mhonn tannem chintlem.  Sodam ratik to te murti lagim vetalo ani il'li-il'li korun ti murti to tolla savn pokhortalo.  Haka lagun ti murti mulla thavn moddun poddpacho sombhov aslo ani ek dis khoreanich ti murti moddun poddli.  Punn poddtana ti tea mon'xacheruch poddli ani to chidd'ddun melo.  Tache nosayen tachi bolli ghetli.

 
Bhai Ghanaya
(02 April '09)

Bhai Ghanaya

Sikh ani Muslim' hanche modim jednam zhogddim choltalim, tednam khubxe Hindu toxech Muslim' soinikank moronn ailem.  Kaim jive asle tanche-i hat-paim moddlole ani ghayall zaun te thoinch poddlole.  Soinik tanen ani votan vollvolltale.  Tednam Ghanaya nanvacho ek Sikh monis tankam soglleank udok haddun pivoytalo.  Lokank tem mandonasle dekhun tannim taka Guru Gobind Singha kodden vhelo ani tacher dhormdrohi mhonn arop kelo.  Gurun Ghanayak apli sofay diunk mekllik dili.  Ghanayan Guruk sanglem "Hanv jednam ronnbhuim-er vetam tednam mhaka konn Sikh va konn Muslim' disona.  Mhaka tankam pollena fuddem tumchench tondd dista." "Ghanaya tum ek khoro Sikh, tujem kam' tum oxench chalu dovor.  Ho lep ghe ani tanchea ghayancher lay.  Tuka lok aichean Bhai Ghanaya mhonn vollkotole."  Bhai mhollear bhav; Sikh lokamodim Bhai hem manachem utor fokot vortea mon'xankuch favo zata.

 
Thomas Edisonan
(01 June '09)

 Thomas Edisonan

Thomas Edisonan jednam aplo novo karkhano ghalo, tednam ek gozal tanchea lokxant aili.  Tanche soglle kamgar ghoddiallik polleun kam' kortale.  Edisonak hachem khub vaitt dislem. To apunn svota khub mhenot korpi monis aslo ani lokamni vell padd kel'lo taka avddonaslem.  Tannem bovall, rag korche poros thonddsannem hacher upay korpak yevjilem.  Tannem aplea karkhaneant sogllea vonntincher torekvar ghoddialli layleo ani dor eke ghoddiallichea vellant thoddo bhov forok aslo. Protyek ghoddiall veg-vegllo vell dakoytali ani kamgarancho guspagondoll zatalo.  Haka lagun kamgaramni ghoddiallik pollevpachem soddun dilem ani aplea kamant chodd lokx ghatlem.

 
Movall Utor
(16 June '09)

Movall Utor

Englandant ek koidi bondkhonnintlean nigtoch bhair sorun aplech bhitor chint'talo.  Apnnak atam konnuch manan lekhcho na mhonn to dukhi zal'lo.  Itlean taka vattevelean vetolo tachea xaracho Mayor mell'lo ani tannem taka mogan hottkilo "Koso asai tum? Itlea tepan tukam polleun borem dislem."  Koidi kachabul zalo ani to taka porot zap dinastana aple vatten cholotuch ravlo.

Kitlexeach vorsamni, pordesant gel'le kodden Mayor ani tea koideachi porot ek favtt bhett zata.  Tea vellar koidi dhanvun tea Mayora lagim veta ani taka ‘Dev Borem Korum' mhonnta.

"Hanvem kitem kelam mhonn tum mhaka Dev Borem Korum mhonntai?" Mayor taka vicharta.

"Hanv bondkhonnintlean suttun samko nirxel'lom, tea vellar tunvem mhaka movall utramni hottkilo ani mhojem chintop ani jivituch bodlun uddoylem".

 

Archived Articles

AICHEM JEVONN
Bore monis tuka vatt dakoytat. Mhan monis tuka thoim vhorun pavoytat.
Read more..
KONKNNI
Bolkanv
Konknni mollar Gõycheo ani her ganvcheo mukhel ghoddnnuko
Angonn
Bhurgeam khatir gitam, kovita, kannio ani her bhurgeanache avddiche borpavollicho punzo.
Motiam
Novim utram, tanchi mahiti ani vapor.
Umalle
SMS-achea mollar Konknni.
Mhoineache Suvalle
Gõychim festam, porbo ani zatra
Lokdaiz
Konknni mon’xachem purvil’lem bhanddar (gitam, kannio, mhonni, humannim, opari, adi).
Lekh
Konknni Sod lekh ani her prokarache lekh.
Kotha
Konknni kotha.
Kovita
Konknni kovita ani gitam.
Ankri
Novim pustokam, CD hanchi vollok.
SOD
Research articles published in TSKK Research Bulletin.
ENGLISH
Designed by Team Inertia Technologies